Paulie T. Ca

Madungis na bayan,

mabaho, makalat, nilalangaw

nakatiwangwang ang basurahan

palikurang walang hugas

Gabundok na kontratang gawa ng iba,

Walang lagda.

Magulong pamamalakad,

bawat isa’y dapat umangat

walang dapat maapakan

taong bayan ang nililinlang

Kayraming katanungan,

Walang kasagutan.

Mga pinuno’y nagmamalinis,

Nangungurakot, nangbubulsa

Iilan lang ang tapat

Kaban ng baya’y winawaldas

Ang daming eskandalong kinasangkutan,

Walang umaamin.

Kaawa-awang nilalang,

tinutuligsa ng lipunan

inaabuso ng makapangyarihan

kinokontrol ng demokrasya

Mga problemang nakaambang,

Walang solusyon.

Hindi siya dapat sisihin,

wala siyang kasalanan

nagpahiram lang siya ng puwesto

naka-upo ang dito’y umabuso

Araw-araw na lumuluha,

Walang ingay.

Malinis o marumi?

nasa mata ng humuhusga

may pag-asa man o wala

taong bayan ang magpapasya

Ilang taon ang aantayin?

‘wag nang bilangin.